🕉️ சிவபுராணத்தின் வாழ்க, வெல்க, போற்றி குறித்து குரு அருளால் எளிய விளக்கம்!

 

🕉️ சிவபுராணத்தின் வாழ்க வெல்க போற்றி – குரு அருளால் எளிய விளக்கம்

சிவாய நம

🌿 திருவாசகத்தின் தன்மை ஒருமை சிறப்பு

திருவாசகத்தின் மிக முக்கிய சிறப்பு என்னவென்றால் —
திருவாசகம் முழுவதும் தன்மை ஒருமையில் (First Person Singular) எழுதப்பட்டிருக்கிறது.

அதாவது, திருவாசகம் முழுவதும் மாணிக்கவாசகப் பெருமானால் உருகி உருகி பாடப்பட்டிருந்தாலும்,
திருவாசகத்தை யார் படித்தாலும் படிப்பவர் ஒவ்வொருவருக்கும் பொருந்தும் வகையில் அமைந்திருக்கிறது.

எனவே, திருவாசகத்தை  யார் உணர்ந்து படித்தாலும்

படிக்கும் ஒவ்வொருவரும் உள்ளம் உருகி பாடுவதாக அமையும்.

அதனால் தான் இதனை —

“திருவாசகத்திற்கு உருகாதார், ஒரு வாசகத்திற்கும் உருகாதார்”
என்று சொல்லியிருக்கிறார்கள்.

🌸 வாழ்க, வெல்க, போற்றி – வார்த்தைகளின் ஆழமான பொருள்

திருவாசகத்தின் முதல் 16 வரிகளில்,
மாணிக்கவாசகர் பெருமான் இறைவனின் திருவடிகளை பற்றியும்
“வாழ்க, வெல்க, போற்றி” என்கின்ற வார்த்தைகளையும் மிக அழகாக உபயோகப்படுத்தியுள்ளார்.

“வாழ்க, வெல்க” என்ற இந்த இரண்டு வார்த்தைகளும் ஐம்பாலுக்கும் பொருந்தும் —
அதாவது, ஆண்பால், பெண்பால், பலர்பால், ஒன்றன்பால், பலவின்பால் என ஐந்து பாலுக்கும்.

இது, இறைவன் அனைத்து உயிர்களிலும், அனைத்து பொருட்களிலும் இருக்கிறார் என்பதாலும்,
இந்த வரிகளை யார் பாடினாலும் அவர்கள் இறைவனை வாழ்த்தும் வகையிலும்,
போற்றும் வகையிலும் அமைந்திருக்கிறது.

🔹 போற்றி என்ற சொல்லின் அற்புதம்!

மாணிக்கவாசகப் பெருமான் “வாழ்க, வெல்க” என்று சொல்லி
“போற்றுக” என்று சொல்லவில்லை;
அதற்குப் பதிலாக “போற்றி” என்ற சொல்லையே பயன்படுத்தினார்.

ஏன்?

ஏனெனில், “போற்றுக” என்றால் அது கட்டளையாக அமையும் —
 “போற்றுக” என்று மாணிக்கவாசக பெருமான் பாடி இருந்தால் அவர் பாடும் பொழுதோ, நாம் பாடும் பொழுதோ
அது இறைவனைப் போற்றுவதாக அமைந்திருக்காது.

ஆனால் “போற்றி” என்றால் 
யார் பாடும் பொழுதும் தாமே இறைவனை போற்றுவதாக  அமைகிறது.

எனவே, மாணிக்கவாசக பெருமான் பாடிய பொழுதும் சரி,

நாம் திருவாசகத்தை பாடும் பொழுதும் சரி —
இறைவனைப் போற்றுவதாகவே அமைகிறது.

🌺 ஏன் இறைவனின் திருவடிகளைப் பற்றி பாடினார்?

மாணிக்கவாசகப் பெருமான் ஏன் இறைவனின் திருவடிகளைப் பற்றி பாடினார் என்பதைக் காண்போம்.

சிவனின் அம்சமான அனுமான்,
ராமரின் திருவடிகளில் தான் எப்பொழுதும் இருப்பார்.

அது மட்டுமன்றி, அனுமான் ஏன் குரங்கு உருவில் இருக்கிறார் என்பதையும்  இங்கு பார்க்கலாம்.

🐒 மனித மனம் – ஒரு குரங்கு போல

மனித மனம் ஒரு குரங்கு போல எப்பொழுதும் அலைபாய்ந்து கொண்டே இருக்கும்.
இந்த மனதைக் கட்டுக்குள் கொண்டுவர, முதலில் தேவை பணிவு.

பணிவு இல்லாத ஒருவரிடம் “நான்” என்ற அகங்காரம் இருக்கும்.
அந்த அகங்காரம் இருக்கும் வரை இறைவனை நெருங்க முடியாது.

இதனை உணர்த்தவே, சிவனின் அம்சமான அனுமான்
ராமரின் திருவடியில் எப்பொழுதும் பணிந்து இருப்பார்.

இதனை உணர்த்தும் வகையிலேயே

மாணிக்கவாசகப் பெருமான் இறைவனின் திருவடிகளை
அன்புடனும் பணிவுடன்
போற்றி, வாழ்த்தி பாடியுள்ளார்.

இதனைப் புரிந்து, திருவாசகத்தைப் படிப்பவர்கள்
மனதிலும் வாழ்க்கையிலும் அந்தப் பணிவு எப்பொழுதும் இருக்க வேண்டும். 

 அனுமனை போன்ற பணிவு நமக்குள்ளும் நம் வாழ்விலும் வரும்பொழுது இறைவனை உள்ளத்தில் உணர முடியும். இந்தப் பணிவை திருவாசகம் முழுவதிலும் நம்மால் உணர முடியும். 

 குருவின் திருவருளால் இதனை உணர வைத்த இறைவனின் திருவடிகளை அன்புடனும் பணிவுடனும் போற்றி வணங்குவோம்! இதைப் படிக்கும் அனைவருக்கும் அந்தப் பணிவு கைகூடவும், இறைவனின் திருவடியை மனதால் பற்றும் பாக்கியம் கிடைக்கவும் ஆத்மார்த்தமான பிரார்த்தனை! சிவாய நம